ჭარხალი შემოდგომის განუყრელი ატრიბუტია, ამიტომაც იგი ხშირად ყველაზე სასურველი პროდუქტია, რომელიც გვიზიდავს როგორც დაბალი ფასით, ისე გემოვნური თვისებებითაც. ჭარხლის როლი კულინარიაშიც ძალზედ მნიშვნელოვანია.
ძალიან ცოტამ თუ იცის, რომ ჭარხლის კულტურა უძველესი დროიდან მოდის და მას ევროპაში ჩვენს წელთაღრიცხვამდე ჯერ კიდე 2000 წლით ადრე აქტიურად იყენებდნენ, როგორც სამკურნალო მცენარეს. ძველ რომში კი ჭარხალს აფროდიზიაკის სახით იყენებდნენ.
როგორც ძველი წყაროებიდან ირკვევა, ჭარხალი შედიოდა ბალკანეთისა და აღმოსავლეთ ევროპის მოსახლეობის კვების რაციონში და შუასაუკუნეებში მათ ჭირთან გამკლავებაშიც კი ეხმარებოდა. დიეტოლოგები დღესაც გვირჩევენ რაციონში ამ პროდუქტის დამატებას, განსაკუთრებით კი იმიტომ, რომ თერმული დამუშავების შემდეგ, იგი საერთოდ არ კარგავს მის სასარგებლო თვისებებს.
ჭარხლის სარგებელი ჯანმრთელობისთვის
ჭარხალი, უპირველე ყოვლისა, გამოდევნის მავნე ნივთიერებებს ორგანიზმიდან. ამასთან, თვითონ პროდუქტში დიდი რაოდენობით სასარგებლო ელემენტია: A, P, B ჯგუფის ვიტამინები, ფოსფორი, კალციუმი, იოდი, მაგნიუმი, კალიუმი, ნატრიუმი და თუთია.
ჭარხალი მდიდარია ფოლიუმისა და ასკორბინის მჟავებით, ამინომჟავებით, ცელულოზითა და ბეტა-კაროტინით. ამიტომაც, გასაკვირი არ არის, რომ ჭარხლის კერძებს ღვიძლის აღდგენაც კი შეუძლია.
ჭარხლის ხშირი მირთმევა ამცირებს ქოლესტერინს, დადებითად აისახება გულისა და სისხლძარღვების ჯანმრთელობაზე, მოქმედებს, როგორც ათეროსკლეროზის პროფილაქტიკური საშუალება. ეს პროდუქტი აუცილებელია კანის საფარველის სწორი ფუნქციონირებისათვის, ხდის კანს მკვრივსა და ელასტიურს და ატენიანებს მას. ქერტლისა და ცხიმიანი თმის პრობლემის გადასაჭრელად, საკმარისია შამპუნში ჭარხლის წვენის რამოდენიმე წვეთის ჩამატება.
100 გ ჭარხლის კალორიულობა 40 კკალ-ს არ აღემატება, შესაბამისად მას დაბალკალორიულ ბოსტნეულის რიცხვს მივაკუთვნებთ. ამიტომაც სარგებლობს იგი პოპოულარობით გახდომის მსურველთა შორის.
მოხარშული ჭარხლის სასარგებლო თვისებები ჯანმრთელობისთვის კი არამხოლოდ ზრდასრულებმა, არამედ ბავშვებმაც უნდა გაითვალისწინონ. არცთუისე იშვიათად, ამ ბოსტნეულისგან ამზადებენ პიურეს, რომელიც ნელ-ნელა შეაქვთ 6 თვის ბავშვის კვების რაციონში.
ეს პროცედურა ძალიან ფრთხილად უნდა გააკეთოთ, რამდენადაც ჭარხალი ალერგიული პროდუქტია. ამიტომაც, პატარას დღეში მხოლოდ მესამედ ჩ/კ პიურეს აძლევენ. მოგვიანებით უკვე მთელ კოვზს, ხოლო თუ ალერგიული რეაქცია არ გამოვლინდება – პიურე ყოველდღიურ რაციონში შეაქვთ. გთავაზობთ ჭარხლის პიურეს რეცეპტს.
ინგრედიენტები
- 3 მოზრდილი ჭარხალი
- 1/3 ჭიქა რძე
- 40 გ მყარი ყველი
- 1 ს/კ კარაქი
- 1 ჩ/კ ხორბლის ფქვილი
- მარილი გემოვნებით
მომზადება
1. მოხარშეთ და გათალეთ ჭარხალი. გახეხეთ წვრილად ან ათქვიფეთ ბლენდერში ერთგვაროვანი მასის მიღებამდე.
2. მოამზადეთ სოუსი – შეზილეთ ფქვილი და კარაქი, მოასხით რძე და ხარშეთ 5 წუთით.
3. ჭარხლის მასას შეურიეთ სოუსი, მოაყარეთ მარილი და გაათბეთ მირთმევამდე.
4. მოაბნიეთ პიურეს გახეხილი ყველი და გემრიელად მიირთვით!
